|
शब्द ॥ 98 ॥
ॐ जिंही गुरु कै खिणहीं ही ताउं , खिणहीं सीउं , खिणहीं पवणा , खिणहीं पाणी ,खिणहीं मेघ मंडाणो । कृष्ण करंता बार न होई ,थल शिर नीर निवाणो । भूला प्राणी विष्णु जंपो रे , ज्यूं मोत टलै जिरवाणो । भीगा है पर भेधा नांही ,पाणी मांह पखाणो । जीवत मरो रे जीवत मरो ,जिन जीवन की विध जाणी । जे कोई आवै हो हो करता , आप जै हुइये पाणी । जाकै बहुती नवणी , बहुती खवणी , बहुती क्रिया समाणी । जाकी तो निज निर्मल काया , जोय जोय देखो ले चढियो अस्मानी । यह मढ देवल मूल न जोयबा ,निज कर जंपो पिराणी । अन्नत रुप जोवो अभ्यागत ,तिहिं का खोज लहो सुरवाणी । सेतम सेतूं , जेरज जेरुं , इंडस इंडू । अइया लो उरध जे खेणी ॥ शब्द ॥ 99 ॥
ॐ साच सही म्हे कूड़ न कहबा नेड़ा था पण दूर न रहीबा ।
सदा सन्तोषी सत उपकरणा । म्हे तजिया मान भी मानूं । बस कर पवणा , बस कर पाणी , बस कर हाट पटण दरवाजों । दशे दवारे ताला जड़िया , जो एसा उसताजों । दशे दवारे ताला कूंची , भीतर पोल बणाई । जो अराधयो राव युधिषिटर ,सो अराधो रे भाई । जिंही गुरु के झुरे न झुरबा , खिरै न खिरणा । बंक त्रिबंके नाल पै नालै , नैणे नीर न झुरबा । बिन पुल बंधया बाणो । तज्या अलिंगण तोड़ी माया ,तन लोचन गुणवाणो । हालीलो भल पालीलो ,सिध पालीलो , खेड़त सूना राणो ॥ शब्द ॥ 100 ॥
ॐ अर्थूं गर्थूं साहण थाटूं कूड़ा दीठा ना ठाटों ।
कूड़ी माया जाल न भूली रे राजेन्द्र ,अलगी रही औजूं की बाटों । नव लख दंताला बार करीलो ,बार करे कर बंद करीलो । बंद करे कर दान करीलो ,दान करे कर मन फूलीलो । तंत मंत बीर बैताल करीलो खायबा खाज अखाजूं । निरह निरन्जन नर निरहारी ,तऊ न मिलवा ,झंझा भाग अभागूं ॥ |
| Website Designed & Maintained By : 29i Technologies | |